കേരള യൂണിവേഴ്സിറ്റി ഓഫ് ഫിഷറീസ് ആൻഡ് ഓഷ്യൻ സ്റ്റഡീസ് (കുഫോസ്) ഗവേഷകർ ഇന്ത്യയുടെ ധ്രുവ ഗവേഷണ പരിപാടിയിൽ ശ്രദ്ധേയമായ സംഭാവന നൽകി. ഭൂമിശാസ്ത്ര മന്ത്രാലയത്തിന് കീഴിലുള്ള നാഷണൽ സെന്റർ ഫോർ പോളാർ ആൻഡ് ഓഷ്യൻ റിസർച്ച് (എൻസിപിഒആർ) സംഘടിപ്പിച്ച 2025–26 ഇന്ത്യൻ ആർട്ടിക് ദൗത്യത്തിന്റെ വേനൽ-ശൈത്യകാല ഘട്ടങ്ങളിൽ ഇവർ സജീവമായി പങ്കെടുത്തു. “ആർട്ടിക് ഫ്യോർഡുകൾ, നദികൾ, തടാകങ്ങൾ എന്നിവിടങ്ങളിലെ കീടനാശിനി അടിസ്ഥാനത്തിലുള്ള സ്ഥിരജൈവ മാലിന്യങ്ങളും (POPs)യും ഉയർന്നുവരുന്ന രാസ മാലിന്യങ്ങളും (CEACs)” എന്ന ഗവേഷണ പദ്ധതിക്ക് കുഫോസിലെ ജലപരിസ്ഥിതി മാനേജ്മെന്റ് വിഭാഗം മേധാവിയായ പ്രൊഫ. അനു ഗോപിനാഥ് നേതൃത്വം നൽകി. തമിഴ്നാട്ടിലെ എസ്‌ആർഎം ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജിയിലെ പ്രൊഫ. പരോമിത ചക്രബർത്തി സഹ-പ്രധാന ഗവേഷകയായി പങ്കാളിയായി. ഈ പദ്ധതി എൻസിപിഒആർ തെരഞ്ഞെടുത്തതോടെ, ആർട്ടിക് പരിസ്ഥിതി പഠനങ്ങളിൽ ഇതിന്റെ പ്രാധാന്യം വ്യക്തമായി.

2025 ഓഗസ്റ്റിൽ നടന്ന വേനൽ ദൗത്യത്തിൽ കുഫോസിലെ പി.എച്ച്.ഡി ഗവേഷകയായ കീർത്തിഗ എസ്. എസ്. പങ്കെടുത്തു. ഫ്യോർഡുകൾ, നദികൾ, തടാകങ്ങൾ എന്നിവ ഉൾപ്പെടുന്ന ആർട്ടിക് ജലമേഖലകളിൽ അവർ ഫീൽഡ് പഠനങ്ങളും സാമ്പിൾ ശേഖരണവും നടത്തി. തുടർന്ന്, 2026 മാർച്ചിൽ നടന്ന ശൈത്യകാല ദൗത്യത്തിൽ ഗവേഷക സംഘാംഗമായ ധിനേഷ് ആർ. പങ്കെടുത്തു. അതിശൈത്യാവസ്ഥയിലുള്ള ആർട്ടിക് സാഹചര്യങ്ങളിൽ ഗവേഷണ പ്രവർത്തനങ്ങൾ തുടരുകയും നിർണായകമായ വിവരങ്ങൾ ശേഖരിക്കുകയും ചെയ്തു. രണ്ട് കാലഘട്ടങ്ങളിലും പങ്കെടുത്തതിലൂടെ വ്യത്യസ്ത കാലാവസ്ഥാ സാഹചര്യങ്ങളിൽ നിന്നുള്ള വിലപ്പെട്ട പരിസ്ഥിതി ഡാറ്റ ശേഖരിക്കാൻ ഗവേഷക സംഘത്തിന് സാധിച്ചു.ദൗത്യത്തിനിടെ ഫ്യോർഡുകൾ, നദികൾ, തടാകങ്ങൾ എന്നിവിടങ്ങളിൽ നിന്നുള്ള വിവിധ പരിസ്ഥിതി സാമ്പിളുകൾ ശേഖരിച്ചു. ഇവയുടെ രാസപരിശോധനയും ജിയോസ്പേഷ്യൽ വിശകലനവും നടത്തി മലിനീകരണങ്ങളുടെ സാന്ദ്രത, ഗതാഗത പാതകൾ, പരിസ്ഥിതിയിലുണ്ടാക്കുന്ന സ്വാധീനങ്ങൾ എന്നിവ വിലയിരുത്തും.

ഇതോടൊപ്പം,  “ഇന്റർ-ഫ്യോർഡ് ആർട്ടിക് സിസ്റ്റങ്ങളിലെ മൈക്രോപ്ലാസ്റ്റിക്കുകളും കീടനാശിനികളും പ്രൊഫൈൽ ചെയ്യുന്നതിനുള്ള അടിസ്ഥാന പഠനം, GIS അടിസ്ഥാനമാക്കിയ അപകട മൂല്യനിർണയവും” എന്ന ഗവേഷണ പ്രബന്ധം 2025-ൽ അന്താരാഷ്ട്ര പ്രശസ്ത ജേണലായ  ജേണൽ ഓഫ് എൻവയോൺമെന്റൽ കെമിക്കൽ എഞ്ചിനീയറിംഗ് -ൽ പ്രസിദ്ധീകരിച്ചിട്ടുണ്ട്.

വേനൽ-ശൈത്യകാല ആർട്ടിക് ദൗത്യങ്ങളിൽ കുഫോസ് ഗവേഷകരുടെ വിജയകരമായ പങ്കാളിത്തം ആഗോള പരിസ്ഥിതി ഗവേഷണ രംഗത്ത് സ്ഥാപനത്തിന്റെ വളർച്ചയും ആർട്ടിക് മേഖലകളിലെ വേഗത്തിലുള്ള പരിസ്ഥിതി മാറ്റങ്ങളെ മനസ്സിലാക്കുന്നതിനുള്ള ഇന്ത്യയുടെ പ്രതിബദ്ധതയും അടിവരയിടുന്നു.

Photo Courtesy - Google